સાચા પ્રેમની પ્રતીતિ. – નિખિલ કિનારીવાળા. અમદાવાદ.

🌹 🌹. 🌹. 🌹. 🌹. 🌹. 🌹. 🌹. 🌹. 🌹. 🌹

કોલેજના દિવસોમાં અનન્ય, પરિમલ અને મેઘાવી ગાઢ મિત્રો હતાં. તરુણાવસ્થાની આ વયે તેઓ દરેક મજાક, મસ્તી અને આનંદમાં સહભાગી રહેતાં. અનન્ય ખૂબ શ્રીમંત અને સંસ્કારી કુટુંબમાંથી હતો. પરિમલ એક સામાન્ય મધ્યમવર્ગી પરિવારમાંથી આવતો હતો. મેઘાવી અતિ સામાન્ય કુટુંબમાંથી હતી. પરંતુ તેમની વચ્ચે આત્મીયતાનો એવો સંબંધ હતો કે, ક્યારેય શ્રીમંતાઈ કે સામાન્ય પરિસ્થિતિનો ઉલ્લેખ માત્ર આવતો નહીં.

અનન્ય અને પરિમલ એકબીજાના ગાઢ મિત્રો, પરંતુ સ્વભાવે તદ્દન વિપરીત. અનન્ય શાંત અને સરળ સ્વભાવનો ઓછાબોલો પરંતુ ખૂબ લાગણી વાળો. જ્યારે પરિમલ ખૂબ તોફાની, ટીખળી, જીવંત પરંતુ વર્તનમાં સ્વચ્છંદી. પરિમલ કોઈપણ બાબત ગંભીરતાથી ન લે. મેઘાવી એક સુંદર, નટખટ અને સંસ્કારી છોકરી હતી. મેઘાવી ને પરિમલનો મજાકિયો અને જીવંત સ્વભાવ ખૂબ ગમતો. અનન્યની ગંભીરતાવાળા સ્વભાવથી મેઘાવીને સુગ હતી. પરંતુ અનન્ય મેધાવીને મનોમન ચાહવા લાગ્યો હતો, છતાં પણ ક્યારેય કહેવાની હિંમત દર્શાવી શક્તો નહીં. ત્રણે મિત્રો હંમેશા સાથે જ જોવા મળે. ચાહે કોલેજના ફંકશન હોય કે કોલેજ બહાર મુવી, નાટક કે નવરાત્રિના ગરબા હોય. ત્રણેય મિત્રોને એકબીજાના ઘરે પણ ખૂબ અવર-જવર રહેતી અને દરેકના માતા-પિતા અને ભાઈ-બહેનો સાથે પણ ખુબ આત્મીયતા હતી. અનન્યના માતા-પિતાને પણ મેધાવી ખૂબ ગમતી અને તેને દીકરી જેવો પ્રેમ આપતા.

આ તરફ ધીરે-ધીરે મેઘાવી પરિમલ તરફ ઢળતી જતી હતી.પરિમલ માંજરી આંખો વાળો અને વાચાળ વ્યક્તિત્વ ધરાવતો હતો.તેને પણ મેધાવીનું આકર્ષણ વધતું જતું હતું. હવે પરિમલ અને મેઘાવી એકલાં મળવા લાગ્યા અને એકબીજા સાથે સાન્નિધ્ય કેળવવા લાગ્યા.પરિમલ અનન્યથી કોઈ વાત છુપાવતો નહીં તેમ તેના અને મેધાવી ના સંબંધ વિશે નાના માં નાની વાતો અનન્યને કહેતો. અનન્ય પરિમલ ને વારંવાર પૂછતો કે મેધાવી સાથેના સંબંધ વિશે તે ગંભીર તો છે ને? પરંતુ પરિમલ તેની વાત હસી કાઢી જવાબ આપતો કે અરે મને મજા માણી લેવા દે. અનન્યએ મેધાવીને પણ અનેકવાર ચેતવી કે, જો તેઓ આ સંબંધમાં ગંભીર હોય તો જ આગળ વધે. પરંતુ બંનેમાંથી કોઈ અનન્યની વાત ગંભીરતાથી સાંભળવા તૈયાર નહોતા. કોલેજમાં અને બહાર સહુ પરિમલ અને મેઘાવીની જોડી અંગે વાતો કરવા લાગ્યા હતા.પરંતુ મેધાવી પણ પરિમલના વ્યક્તિત્વથી અને વાક્ચાતુર્યથી પૂરેપૂરી અંજાઇ ચૂકી હતી અને બીજું કશું વિચારી શકે તેમ નહોતી.

સમય જતાં કોલેજકાળ પૂરો થયો અને સહુ પોતપોતાની કારકિર્દી બનાવવા તરફ આગળ વધ્યા.પરિમલે વધુ અભ્યાસ માટે વિદેશ જવા પ્રયત્ન શરૂ કર્યા.મેધાવીને વિદેશથી પરત ફર્યા બાદ લગ્નનો વાયદો કરી તે વિદેશ ઉપડી ગયો. અનન્ય પિતાના ફેલાયેલા વ્યવસાયમાં જોડાઈને વ્યસ્ત થઈ ગયો.પરંતુ તે મેધાવીને ભૂલી શક્યો નહોતો. અવારનવાર મિત્રતાના ભાવે મેધાવીને મળતો અને તેને ખુશ રાખવા પ્રયત્ન કરતો. પરિમલ શરૂશરૂમાં મેઘાવીને કોલ કરીને વાતો કરતો અને ખબર પૂછતો. પરંતુ સમય જતાં તેના ફોન ઓછા થઇ ગયા. ધીરે ધીરે બધા મિત્રો સાથે તેનો સંપર્ક બંધ થઈ ગયો. મેધાવી હતાશામાં સરી પડી અને તેને પરિમલે છેતરી હોવાની લાગણી પ્રબળ થવા માંડી.

અનન્યએ મેધાવીની પરિસ્થિતિની જાણ થતાં પરિમલનો સંપર્ક કરી તેને સમજાવવા ખૂબ કોશિશ કરી અને મેઘાવીને આપેલ લગ્નનો વાયદો પૂરો કરવા જણાવ્યું. પરિમલ બદલાઈ ચુક્યો હતો. અનન્યની મિત્રતા પણ તેને ફગાવી દીધી અને સ્પષ્ટ રીતે કહ્યું કે હવે તે મેઘાવી જોડે કોઈ સંબંધ રાખવા માંગતો નથી. કોલેજના દિવસો ભૂલી મેધાવીએ હવે તેની જિંદગીમાં બીજા પાત્ર સાથે આગળ વધવું જોઈએ. તે પોતે પણ વિદેશમાં ગ્રીન કાર્ડ ધરાવતી અન્ય છોકરી સાથે સંપર્કમાં છે અને તેની સાથે લગ્ન કરી ત્યાં જ સ્થાયી થવા માંગે છે. અનન્ય એક સમયના તેના ગાઢ મિત્રના આવા બેજવાબદાર વર્તાવથી ડઘાઈ ગયો અને ભારોભાર નિરાશા અનુભવવા લાગ્યો.

અનન્ય મૂંઝવણ અનુભવવા લાગ્યો કે મેધાવીને કયા શબ્દોમાં પરિમલના નિર્ણયની જાણ કરવી. હિંમત એકત્ર કરી બીજે દિવસે મેઘાવીને કોફી શોપમાં બોલાવી વાસ્તવિક પરિસ્થિતિ જણાવી અને પરિમલને ભૂલી જીવનમાં આગળ વધવા સમજાવી.મેધાવી અનન્યના ખભે માથું મૂકીને ખૂબ રડી. તેના મનની દ્વિધા એ હતી કે હવે મને કોણ સ્વીકારશે? મારી જીંદગી તો અસ્તવ્યસ્ત થઈ ગઈ. બીજી જ ક્ષણે અનન્યએ મેધાવીની આંખ માં આંખ પરોવી કહ્યું. ‘મેધાવી, હું તારી સાથે લગ્ન કરવા તૈયાર છું જો તું તૈયાર હોય તો. હું તને અઢળક પ્રેમ કરું છું અને તને જીવનમાં ક્યારેય નિરાશ નહીં કરૂં તેની હું તને ખાતરી આપું છું. તારા જેવી સુંદર,સરળ અને સમજદાર જીવનસાથી તો જે નસીબદાર હોય તેને જ મળે. મેધાવી, ભૂતકાળ ભૂલી જા અને મારો હાથ પકડી મને પણ મારી જીવનયાત્રામાં સહારો આપ. આ નિર્ણય લેવા માટે તને ક્યારેય પસ્તાવો નહીં થાય.’

મેધાવીની આંખોમાં હર્ષના આસું આવી ગયા. આંખો મીંચી અનન્યને વળગી પડી અને બોલી, મારી બાજુમાં રહેલ રત્નને હું પારખી શકી નહીં અને પથ્થર પર આંધળો વિશ્વાસ કર્યો. તારો ખૂબ ખૂબ આભાર મને સંભાળી લેવા માટે. અનન્યએ મેધાવીના હોઠ ઉપર આંગળી મૂકી કહ્યું ‘બસ કર ગાંડી. ચાલ ઘરે જઈએ. મારા માતા-પિતા તારી રાહ જુએ છે.’ સાચે જ અનન્યના ઘરે મેધાવીનું એટલું ઉષ્માભર્યું સ્વાગત થયું કે મેધાવી એક નવી પ્રેમાળ દુનિયામાં બધું ભૂલીને પ્રવેશી ગઈ. અનન્ય જેવો સરળ, પ્રેમાળ અને લાગણીશીલ જીવનસાથી મેળવ્યાનો રોમાંચ એની ચરમસીમાએ હતો.

અનન્ય અને મેધાવીના ધામધૂમથી લગ્ન થયા અને તેમના પ્રફુલ્લિત લગ્ન જીવનનો પ્રારંભ થયો.

– નિખિલ કિનારીવાળા
અમદાવાદ