માત્ર સમય જ નથી આપણી પાસે…- નિખિલ કિનારીવાળા, અમદાવાદ

👇🏻એક સમયોચિત ચિંતન લેખ.

: માત્ર સમય જ નથી આપણી પાસે…

તાજેતરમાં જ પ્રખ્યાત ગાયક કે.કે.(પુરું નામ ક્રીષ્ણકુમાર કુન્નથ)ના ૫૩ વર્ષની ઉંમરે આકસ્મિક અવસાનના સમાચાર સાંભળ્યા. તેમના ચાહકો અને અસંખ્ય સંગીતપ્રેમીઓ આ સમાચાર સાંભળી આઘાતમાં ઘેરાઈ ગયા. એક સંગીતપ્રેમી હોવાના નાતે હું પણ આ સમાચારથી ખૂબ વ્યથિત થયો. આ સાથે જ મન એક જુદા જ વિચારના ચકરાવે ચડ્યું. કે.કે.ના જીવન વિશે તો હું કશું જ જાણતો નથી. ભૂતકાળમાં પણ આવી ધણી નામી પ્રતિભાઓના જીવનદીપ કસમયે બુઝાઈ ગયા. પરંતુ આવી આકસ્મિક અકલ્પનીય ધટનાઓ આપણા જીવન વિશે વિચારતા કરી મૂકે છે. અંતરમનની બંધ બારીઓ ઉધાડી દે છે. જે આ જગતમાં આવે છે તેણે નિશ્ચિત જવાનું છે. નિયતીએ આપણા સૌના લેખ સુનિશ્ચિત કરી રાખ્યા છે. આપણે પણ આમાંથી બાકાત રહેવાના નથી. શું, ક્યારે, કેમ, શા કારણે આ બધા પ્રશ્નો નિરુત્તર રહી જવાના છે અને જગતમાંથી આપણી બાદબાકી થઇ જશે.

માણસ માત્ર તરીકે આપણે સતત અસંખ્ય લાગણીઓ, સંવેદનાઓ અને મહત્વકાંક્ષાઓથી ઘેરાયેલાં રહીએ છીએ. ઘણું બધું પ્રાપ્ત કરી લેવાની જિંદગીની દોડમાં આપણે એટલા બધા તેજ ભાગવા લાગીએ છીએ કે ધણી વખત આપણી લાગણીઓ અને સંવેદનાઓને સાંભળવાનું ચૂકી જઈએ છીએ. ઘણું બધું લેવામાં ઘણું બધું આપવાનું રહી પણ જાય છે. જિંદગીના અમુક પડાવે પહોંચતા જીત અને સંતોષની લાગણી અચૂક અનુભવાય છે. બધું જ હોય છે પરંતુ એક સમય જ નથી હોતો. ક્યારેક આપણા પોતાના માટે તો ક્યારેક આપણા પોતીકા માટે. આ જીવનની દોડમાં ક્યાંક અધવચ્ચે જ પડદો પડી ગયો તો? હજુ ઘણું બધું કરવાનું, લેવાનું, આપવાનું તો બાકી રહી ગયું, એ લાગણીઓ હૃદયમાં સંઘરીને વિદાય થઈ જઈશું.

માણસની મહત્વકાંક્ષાઓનો કોઈ અંત નથી. પરંતુ હું મારી સમજણ પ્રમાણે કહું તો, જીવનમાં એક તબક્કા પછી લાગણીઓ અને સંવેદનાઓને ક્યારેય સંઘરી ન રાખીએ. તેને વહેતી કરીએ. સ્પષ્ટ વિચારો કેળવીએ અને તેની સચોટ અભિવ્યક્તિ કરીએ. પોતાને પોતા માટે જે જોઈએ છે તે ખુલ્લા અવાજે જાહેર કરીએ. જે જેને આપવું છે તેમાં ક્ષોભ વગર અગ્રેસર થઈએ. દરેક હકદારને આપણા પ્રેમ, સ્નેહ, આદર અને લાગણીનો સાક્ષાત્કાર કરાવીએ. કશું પણ કાલ ઉપર બાકી ન રાખીએ. દિવસના અંતે એવી સંતોષની લાગણી થવી જોઈએ કે આપણા પોતાના જીવનના બગીચાની આપણે ભરપેટ જાળવણી કરી તથા તેના ફૂલોની સુગંધથી આપણે અંદરથી મહેંકી ઉઠ્યા છીએ.

આપણી પાસે કદાચ બધું જ હશે માત્ર નહીં હોય તો તે છે સમય. માટે સમયના ચક્રને માન આપીને કોઈ પણ સારાં ઈચ્છિત કામ આવતી કાલ ઉપર ન રાખીએ અને આજે જ તેના પર અમલ કરીએ. ગમતી પ્રવૃત્તિ આવતી કાલ પર ન ટાળીએ, સ્વજનો સાથે બે પ્રેમના શબ્દોની આપ-લે આવતી કાલ ઉપર ન રાખીએ, કોઈનો આભાર વ્યક્ત કરવાનો હોય તો એ આજે જ કરીએ, જિંદગીને ભરપૂર પ્રેમ કરીએ અને જે કંઇ મળ્યું છે તેને માટે ઈશ્વરનો ખરા હૃદયથી આભાર માનીએ. આટલું કરશું તો સમય સાથેની દોડમાં ક્યારેય પાછળ રહી નહીં જવાય.

નિખિલ કિનારીવાળા, અમદાવાદ